оперативтік барлау

(Оперативная разведка)

әркеттегі немесе ықтимал қарсылас жайлы және операцияны (ұрыс қимылдары) дайындау мен табысты жүргізу мүддесінде әскери қимылдар ауданы туралы мәліметтерді іздеп табу және зерделеу жөніндегі шаралар жиынтығы. О.б. әскери барлаудың құрамды бөлімі ретінде оның басқа бөлімдерімен – стратегиялық барлаумен және тактикалық барлаумен тығыз байланыста болады. О.б. ықтимал немесе әрекеттегі қарсылас туралы әскери қимылдарды бастауға тікелей дайындық жасау шараларын, ядролық қару қолдану мүмкіндігін, күш пен құралдардың жауынгерлік мүмкіндіктерін, қимылдардың ықтимал сипатын, ядролық қарудың, ату, радиоэлектронды құралдар мен басқару пункттерінің барысы мен орналасу орнын, авиацияның, әуе шабуылына қарсы, ракетаға қарсы қорғаныс құралдарының орналасуын және қимылдар сипатын, тылдық қамтамасыз ету жүйесін, әскерлердің саяси-моральдық жағдайын және басшылыққа керекті басқа да мәліметтерді анықтайды. О.б-дың ұрыс қимылдар ауданы туралы анықтайтыны: жергілікті жер сипаты, табиғи жағдайы, оперативтік жабдықтар дәрежесі, жергілікті жер ресурстарының болуы, жергілікті жер тұрғындарының саяси көңіл-күйлері. О.б. жүргізу тереңдігі ұрыс қимылдарының ауқымы мен сипатына, бірлестіктегі ұрыс тапсыр-маларының мазмұны қарсылас әскерлерін жедел сапқа тұрғызу тереңдігіне, ұрыс қимылдары театрының ерекшелігіне және т.б. байланысты. О.б. бірлестіктегі ұрыс қимылдарының барлық тереңдігі және бүкіл алқабы бойынша қажетті мәліметтерді уақытымен алуды қамтамасыз етуі керек. Осы мәліметтер негізінде қолбасшы және бірлестік штабы жағдайдың ықтимал өзгерістерін алдын ала көру және айқас барысындағы әскерлер мен қаруды басқару мүмкіндігін жасай алады.